ព្រះសីហនុ៖ សំណង់របងរឹងមាំស្កឹមស្កៃត្រូវបានសាងសង់នៅកណ្ដាលបណ្ដោយឆ្នេរអូរឈើទាលស្ថិតនៅក្នុងសង្កាត់លេខ ៤ ក្រុងព្រះសីហនុ ត្រូវបានសាងសង់បានយ៉ាងរលូននៅលើឆ្នេរដោយមិនមានការហាមឃាត់ពីអាជ្ញាធរមន្ត្រីជំនាញក៏ដូចជាគណៈកម្មការឆ្នេរនោះឡើយ ខណៈដែលអាជ្ញាធរបានលើកថាជាកម្មសិទ្ធិឯកជន និងបានសាងសង់ដោយមានច្បាប់ត្រឹមត្រូវ។

អ្នកនាំពាក្យសាលាខេត្តព្រះសីហនុ និងជាអភិបាលរងខេត្ត លោក ឡុង ឌីម៉ង់ បានបញ្ជាក់ថា ទីតាំងដីខាងលើពីមុនគឺជារបស់អង្គភាពនគរបាលជើងទឹក ហើយត្រូវបានធ្វើអនុប្រយោគទៅជាសម្បត្តិឯកជនរបស់រដ្ឋ និងប្រគល់ឱ្យក្រុមហ៊ុនឯកជនធ្វើការអភិវឌ្ឍន៍បន្ត។

លោកបញ្ជាក់ថា៖ «នីតិវិធីការកសាងប័ណ្ណកម្មសិទ្ធិ គឺត្រឹមត្រូវរួចអស់ហើយពីរាជរដ្ឋាភិបាលតាំងពីឆ្នាំ២០០៧ និងចេញប័ណ្ណតាំងពីឆ្នាំ២០០៨ ចេញប័ណ្ណកម្មសិទ្ធិឯកជន»។

ប្រធានភូមិបាលក្រុងព្រះសីហនុ លោក ថៃ គឹមស័រ ក៏បានបញ្ជាក់ឲ្យដឹងដែរថា ការសាងសង់របងខាងលើនេះគឺម្ចាស់ដីបានសាងសង់នៅលើដីដែលមានប្លង់កម្មសិទ្ធិរបស់គេតែប៉ុណ្ណោះ គឺមិនបានសាងសង់នៅលើឆ្នេរនោះទេ ហើយលោកក៏បានចុះទៅវាស់វែង ឃើញថារបងបានសាងសង់ចូលមកក្នុងដីកម្មសិទ្ធិប្រវែងពីតឹកទៀតផងគឺមិនរំលោភចូលឆ្នេរនោះទេ។

លោកថា ដូចនេះការសាងសង់របងនៅឆ្នេរអូរឈើទាលខាងលើគឺត្រឹមត្រូវទៅតាមច្បាប់មិនដូចមតិមហាជនបានលើកឡើងទេគឺម្ចាស់ដីបានសាងសង់ត្រឹមត្រូវទៅតាមប្លង់ប្រព័ន្ធតែប៉ុណ្ណោះ។

ពេលនេះរបងត្រូវបានសាងសង់បានស្ទើរតែរួចរាល់ ១០០% ដោយទីតាំងរបងនៅតាមបណ្ដោយឆ្នេរអូរឈើទាលដែលភ្ញៀវទេសចរទាំងជាតិនិងអន្តរជាតិតែងតែពេញនិយមមកលេងកម្សាន្តហើយក៏មានការថតបង្ហោះនៅតាមបណ្ដាញសង្គមនិងការចែករំលែកតៗគ្នាទាក់ទងនឹងការសាងសង់របងនៅឆ្នេរអូរឈើទាលនេះផងដែរ៕